Repository logo
 

Te Whare o te Reo Māori: Te rima tekau tau o te whakarauoratanga reo Māori

Files

Thesis(2.35 MB)

Date

2024

Authors

Supervisor

Stewart, Georgina Tuari
Mahuta, Dean

Item type

Thesis

Degree name

Doctor of Philosophy

Journal Title

Journal ISSN

Volume Title

Publisher

Auckland University of Technology

Abstract

Nau mai, tomo mai rā ki tēnei whare rangahau, ki tēnei whare kōrero āku. I roto i tōna 50 tau nei (1972-2002), nā wai i āhua ‘marae puehu,’ ka poua ko ngā kaupapa reo Māori, tū mai ana ko te ‘whare o te reo Māori.’ Ko te ‘whare’ e kōrero nei ahau, ehara i te whare kikokiko nei, engari ia he whare hei ariā mō te ao o te whakarauora reo Māori mai anō i te kawenga atu o te petihana reo Māori ki te Whare Pāremata i te tau 1972. E whakaritea ana e ahau ki te ‘whare’ nā te mea ko te whare te tino āhurutanga o te tangata. He tāhū tōna, he pou ōna e tū ai. He pakitara ōna, e whakawehea ai ngā mea o roto i ngā mea o waho. He kawa, he tikanga ōna e pai ai ōna whakahaere. He mana tō te kupu, otirā ko tā te kupu he whakatupu, he whakaū hoki i te mana o te tangata. Nō reira, kei roto i te whare o te reo Māori nei, e whakaaweawe nui ana te hunga whaikupu i ōna whakahaere me ngā āhuatanga e pā ana ki te tomo rānei, ki te kore rānei e tomo o ērā kei waho o te whare. Ko te nuinga o te iwi Māori ināianei, kei waho kē o te whare nei. Mō te āhua ki taku whare rangahau, ehara noa i te rangahau reo Māori, engari ia he rangahau Kaupapa Māori tonu. E ono rawa ngā mātāpono o te Kaupapa Māori e tika ai kia kīia he Kaupapa Māori whaihua. I tēnei rangahau, ka tūhuratia te nunumi o ngā mātāpono o te Kaupapa Māori i tērā e kīia nei ko ngā ‘taonga tuku iho.’ Ko tētehi tonu o ngā mātāpono e tino whakawarewaretia ana, ko te ‘piki ake i ngā raru o te kāinga.’ Nō reira, koia tonu hei tino whakatāuteutetanga māku, me taku whakapae, nā tēnei mea te moni i piki ai ētehi i ngā raruraru o te kāinga, ko ētehi kē ia, tapoko kau atu ana i aua raruraru rā. I roto i te āhua 40 tau ka pahemo ake nei, e haere ana ngā mahi o roto i te ‘whare o te reo māori’ engari me te kaha kē atu o te tetē o ngā niho o te moni kei roto i ngā kaupapa a te kāwanatanga, otirā me ngā karawhiu mai o te ao hurihuri. Ka tomokia ana taku whare rangahau, ka tae ki ngā pou e toru o te whare: Kei te pou mataaho, he whakakaupapa i te rangahau te mahi, ko ngā upoko 1-3 ēnei. Ko ngā pātai e pā ana ki te rangahau, ko ēnei nā: Nā wai, ā, nō whea hoki te kairangahau? He aha te kaupapa rangahau? He aha te huarahi rangahau e whāia ana? Ka whakatūria ake ko Te Whare o te Reo Māori hei ariā mō te 50 tau o te whakarauoratanga reo Māori, ā, ka whakaahuangia taua whare rā. Tae rawa ki te pou tokomanawa (upoko 4-6), ka mātua uia te pātai ‘Mō wai te reo Māori?’ (Upoko 4), ā, ka tūhuratia ngā kōrero mō te pīkoko o te tangata, mō te waimarie kē rānei ōna e tomokia ai e ia te whare o te reo Māori. Ki te Upoko Tuarima tātaihia ai ngā whakapapa kōrero mō te ‘tuakiri’ Māori, arā, he kupu Māori ‘hou,’ e mea nei au he tohu nō te uruuru mai o ētehi mātāpono kē atu ki te ao Māori. Ka tōmenetia hoki ngā taukumekume o te whāinga kia noho ko te reo Māori hei tohu i te tuakiri ā-motu o Aotearoa me Te Waipounamu. Ki te Upoko Tuaono tōmenehia ai tētehi atu kupu Māori ‘hou.’ Tuatahi ake, ka tātai i ngā whakapapa o ngā kupu nei, a ‘ohaoha’ me ‘ōhanga’ (=economy) me kore noa ka kitea āe rānei e urutomokia ana te reo Māori, he haehae i te mātāpono Māori. Ka tūhurangia ngā mātāpono e pā ana ki te hanga kupu Māori hou, me te whakaaro kāore noa iho te ariā o te ‘economy’ e ‘haere maro-kore’ noa mai ki roto i te reo Māori. Ki te Upoko Tuawhitu ka whiriwhirihia ngā whakaaro hei whakautu i ngā pātai o te rangahau. Tae rawa ki te Upoko Tuawaru, ka tōia te kūwaha o te kaupapa nei kia kati. Nā, ko au tēnei, kua waimarie i te 40 tau neke atu ōku e whakaruruhia ana i roto i te ‘whare reo Māori,’ i te ‘whare Kaupapa Māori’ hoki, kua neke atu hoki i te 20 tau ōku e kura mahita ana i te Kura Kaupapa Māori. Ko taku tūmanako, mā taku whare rangahau e paku hinātore mai ai ētehi tūāhuatanga o te ‘whare o te reo Māori,’ me kore noa, ka kitea ētehi o ngā mātāpono e mahi ana i roto i te whare, i waho anō hoki.

Description

Keywords

Source

DOI

Publisher's version

Rights statement

Permanent link

http://hdl.handle.net/10292/17826

Collections

Doctoral Theses