Ki te tirohia te waiaro a te hunga rangatahi Māori ki te reo, me te whai wāhitanga mai o taua reo rā ki ō rātou whakaaro mō ō rātou tuakiri, ka kitea te noho taparua, te rerekē hoki o tētahi i tētahi. He mea tāwharau tēnei rangahau e te ariā Kaupapa Māori, engari kua toro atu hoki ki ngā tukanga o te ariā ā-wheako me te ariā ā-toi (mā roto mai i tētahi mahinga toi), kia puta ai tētahi huarahi rangahau hou hei whakawhānui pea i te titiro ki te pātai matua o tēnei rangahau. I roto i te rangahau ā-wheako, ko tā te kairangahau he aro ki a ia anō, ki ōna anō wheako; "The power of heuristic inquiry lies in its potential for disclosing truth. Through exhaustive self search, dialogue with others, and creative depictions of experience, a comprehensive knowledge is generated" (Douglass and Moustakas, 1985, wh. 40). Ko tā tēnei rangahau, arā, tēnei tuhinga whakapae me tētahi mahinga toi, he tuari i ngā wheako kua titia ki te whatumanawa ā mohoa nei, i tangata whenua ai, i noho manuhiri ai rānei te reo i roto i a au. Ko Te Here Pūrengi te ingoa o te mahinga toi i waihangā hei hoa haere mō tēnei tuhinga whakapae. Ko tāna he whakapuaki mai i ngā kōrero e hono atu ana ki ētahi pou e waru o te whare o Te Pūrengi, kei te marae o Ngā Wai o Horotiu. E whakapono ana mā te ketuketu i ngā whakataukī, te tuitui atu hoki i ērā whakataukī rā ki ngā pou whakairo o te whare, e rangiwhāwhā ake ai pea te titiro a te rangatahi Māori, kaua ki te ao Māori anake, engari ki te whai wāhitanga mai o tērā ao ki ō rātou nā ao, ki ō rātou nā tuakiri hoki.